परभणी : नर्सिंग अभ्यासक्रमाच्या परीक्षेदरम्यान प्रश्नपत्रिकेची गोपनीयता भंग झाल्याचा प्रकार परभणीत समोर आला आहे. परीक्षा केंद्रावर पर्यवेक्षकाची जबाबदारी असलेल्या महिलेने प्रश्नपत्रिकेचे मोबाईलमधून फोटो काढून ते आपल्या बहिणीला व्हॉट्सॲपद्वारे पाठवल्याचा आरोप आहे. या घटनेमुळे परीक्षा व्यवस्थेतील सुरक्षेवर प्रश्नचिन्ह निर्माण झाले आहे.
परभणी शहरातील इंदिरा गांधी एएनएम नर्सिंग स्कूलमध्ये महाराष्ट्र राज्य शुश्रूषा व परावैद्यक शिक्षण मंडळाची परीक्षा सुरू असताना हा प्रकार घडला. २० ऑगस्ट रोजी जीएनएम प्रथम वर्षाचा पेपर सुरू असताना सकाळी सुमारे १०.२९ वाजता पर्यवेक्षक म्हणून नियुक्त असलेल्या राखी चव्हाण यांनी मोबाईलच्या माध्यमातून प्रश्नपत्रिकेचे छायाचित्र घेतल्याचे समोर आले.
हे छायाचित्र त्यांनी आपली बहीण राणी चव्हाण हिला व्हॉट्सॲपवर पाठवल्याची माहिती तपासात पुढे आली. परीक्षा केंद्रावर मोबाईल वापरण्यास निर्बंध असतानाही प्रश्नपत्रिकेचे फोटो काढण्यात आल्याने केंद्रातील अधिकाऱ्यांना या प्रकाराची माहिती मिळाली.
यानंतर केंद्र निरीक्षक विश्वजीत मठपती यांनी संबंधित पर्यवेक्षिकेच्या मोबाईलची तपासणी केली. त्यावेळी प्रश्नपत्रिकेचे फोटो आढळून आल्याने प्रकरणाची माहिती पोलिसांना देण्यात आली. प्रश्नपत्रिकेची माहिती पुढे आणखी कोणापर्यंत पोहोचली होती का, याचाही तपास सुरू आहे.
या प्रकरणी केंद्र निरीक्षकांच्या तक्रारीवरून राखी चव्हाण, राणी चव्हाण, प्रतीक्षा किरण खिल्लारे, ईश्वर बाराबोईना आणि दिलीप बोरकर यांच्याविरुद्ध नानल पेठ पोलीस ठाण्यात गुन्हा दाखल करण्यात आला आहे.
पोलिसांकडून या प्रकरणातील आरोपींची चौकशी करण्यात येत असून, प्रश्नपत्रिकेचे छायाचित्र काढण्यामागील उद्देश तसेच ते पुढे कोणाला पाठवण्यात आले होते का, याबाबत तपास केला जात आहे. त्यामुळे या प्रकरणाच्या तपासातून आणखी काही माहिती समोर येण्याची शक्यता आहे.