सेलू : शहरातील अजंटा कॉलनी परिसरात प्रतिबंधित गुटखा व तंबाखूजन्य पदार्थांच्या साठ्यावर पोलिसांनी कारवाई करत तब्बल ५९,९६० रुपयांचा मुद्देमाल जप्त केला. ही कारवाई दिनांक १९ एप्रिल २०२६ रोजी सायंकाळी करण्यात आली असून, या प्रकरणी सेलू पोलीस ठाण्यात गुन्हा क्रमांक २०७/२०२६ अन्वये भारतीय न्याय संहिता २०२३ च्या कलम १२३, २७४, २७५, २२३ अंतर्गत गुन्हा दाखल करण्यात आला आहे.
स्थानिक गुन्हे शाखेचे विष्णू असाराम चव्हाण यांनी दिलेल्या फिर्यादीवरून आरोपी शेख राजू शेख इब्राहीम (रा. अजंटा कॉलनी, सेलू) याच्याविरुद्ध कारवाई करण्यात आली. आरोपीने आपल्या राहत्या घरात व किराणा दुकानात आर्थिक फायद्यासाठी प्रतिबंधित गुटखा व पानमसाल्याचा साठा करून ठेवला होता. पोलिसांची चाहूल लागताच तो घटनास्थळावरून पसार झाला.या कारवाईत केसरयुक्त विमल पानमसाला, V-1 तंबाखू, प्रिमियम राजनिवास पानमसाला व के.एम. जाफरानी जर्दा असे विविध प्रकारचे तंबाखूजन्य पदार्थ जप्त करण्यात आले. परभणी गुन्हा शाखा व पोलीस निरीक्षक दीपक बोरसे यांच्या मार्गदर्शनाखाली ही कारवाई करण्यात आली असून पुढील तपास पोलीस उपनिरीक्षक शेख यांच्याकडे सोपविण्यात आला आहे.
पोलीस कारवाईचे कौतुक; मात्र खुले विक्रीवर कारवाई कधी?
पोलिसांनी केलेली ही कारवाई कौतुकास्पद असली तरी सेलू शहरात अजूनही गुटखा खुलेआम टपऱ्यांवर सहज उपलब्ध होत असल्याचे चित्र आहे. विषासमान मानल्या जाणाऱ्या या गुटख्यामुळे युवकांमध्ये व्यसनाधीनता वाढत असल्याची चिंता नागरिक व्यक्त करत आहेत. शहरात मोठ्या प्रमाणावर गुटखा पुरवठा करणाऱ्या मुख्य विक्रेत्यांवर कधी कडक कारवाई होणार, असा सवालही नागरिकांकडून उपस्थित केला जात आहे. त्यामुळे पोलिसांनी अशा कारवायांचा धडाका कायम ठेवत मुळापर्यंत पोहोचण्याची गरज व्यक्त होत आहे.